Bojka ło "Miłości" i "Szalyństwie"

Blaszany · Gość

Bojka ło „Miłości” i „Szalyństwie”

Powiadajom , że jednego raza spotkały sie na Ziymi wszyjskie uczucia i cechy kere som nom – ludziskom, przipisane.

Kiej „Znudzynie” ziywnyło trzeci roz, „Szalyństwo” jak zawdy dzikie, wrzasknyło !

- Szukejmy sie !

„Intryga” - zdziwiono yno łocami przewróciła.

„Ciekawość”- jako, że sama miała we swoji naturze, zapytała.

- A co to za graczka ?

„Szalyństwo” łodpedziało.

- Zakryja se ślypia i byda pomaluśku liczyć do miliona. Wtyczos wy wszyjskie dobrze sie skukocie, a kej dońda do miliona, naczna Wos szukać.

Znojść musza wszyjskich podug raji. Jednako tyn, kery bydzie piyrszy znoleziony, bydzie szukał drugom turom.

Podszpontowany „Entuzjazm” naczon tańcować ze „Euforiom”.

Ucieszono „Radość” podskakiwała tak wysoko, że na som widok „Wontpliwość” i „Apatio” przekonały sie do tyj graczki.

Jednako dało sie tyż wyczuć, że njy wszyjscy na krycie mieli chyntka.

„Prowda” wolała sie njy chować, bo i tak zawdy wyłaziła na wjyrch.

„Duma” łodpedziała, że ta graczka je gupio. Nale tak richticznie bolało jom to, iże pomyślunek wyszoł łod kogoś inkszygo.

„Tchórzostwo” skuli swoji natury, niy chciało ryzykować .

- Roz , dwa , trzi - napoczło liczyć Szalyństwo.

Nojgibsij schowało sie „ Lynistwo ”, bo lygło za nojbliższym krzokiym.

„Wiara” pofurgła do nieba, zasik „Zazdrość” skukała sie we ciynju „Tryjumfu”, kery wyspinoł sie na som wiyrch stromu.

„Wspaniałomyślność” dugo njy mogła znojś dlo siebie miejsca, skuli tego, iże wszyjskie kryjowki wydowały sie ji w som roz dlo kamratow.

Klarowny stowik, naisto boł nojlepszym placym dlo „Piykności”, dziupla we pnioku - w som roz dlo „Niyśmiałości”, krzidła szmaterloka zmyślnym dlo „Zmysłowości”, powiyw wiatru stoł sie nojlepszy dlo „Wolności”.

Po dugim medikowaniu i „Wspaniałomyślność” znodła swoj plac. Skukała sie za promyczkiym słońca.

„Egoizm”, w som roz do swojigo miana, wysznupoł szykowne miejsce : wygodne i ciepluśkie, a co nojważnjyjsze - przeznaczone yno dlo niego.

„Kłamstwo” skukało sie na dnie oceanu, a tak richticznie scyganiło, bo skryło sie za tyczom ?

„Pasja” i „Pożądanie” we porywie gorkich uczuć wskoczyli w som środek wulkanu. Wyleciało mi ze palicy, kaj skukało sie „Zapomniynie ”, nale terazki to już je ajnfach.

Kej „Szaleństwo” wyliczało : dziewiyńset dziewiyńdziesiont dziewiyńć tysiyncy dziewiyńset dziewiyńdziesiont dziewiyńć, „Miłość” jeszcze niy znodła dlo siebie placu, toż łostatkiym sił wpadła miyndzy krzoki dzikich roziow.

- Milion – wrzaskło wreszcie „Szalyństwo” i wziyno sie do szukanio kamratow.

Już po poru krokach naszło skryte „Lynistwo”. Chwila potym usłyszało „Wiara”, kero łosprawiała we niebie ze PonBoczkiym.

We ryku wulkanow wyczuło obecność „Pasji” i „Pożądanio”. Potym bez cufal naszło „Zazdrość”, co gibko doprowadziło je do kryjowki „Tryjumfu”.

„Egoizmu” njy czaboło wcale szukać, bo jak ze szlojdra wylecioł ze swoji kryjowki, kej łokozało sie, iże wpakowoł sie w somuśki środek gniozda szerszyni.

Troszyczka już markotne znojdowaniym „Szaleństwo”, zicło na chwilka nad wodom stowika i tak bez cufal naszło „Piynkność”.

Ze znoleziyniym „Wontpliwości” tyż niy boło problyma, a to skuli tego, iże niy poradzioło sie zdecydować, ze keryj strony płota nojlepij stanońć.

Cołko reszta tyż łostala znaleziono i tak :

„Talynt” we pojstrzodku świyżych zioł ,

„Smutek” - we przepastnyj jaskini ,

„Zapomniynie”.......... , już downo zapomniało, we jako graczka sie bawi.

Do znoleziynio łostała yno „Miłość”.

„Szaleństwo” wszyndy zaglondało : pod kożdy kamień we potoku, lotało po szczytach gor i już, już miało przestać, aże nogle zaglondło miyndzy badyle krzoka rozi.

Niy dała tam rady wlyź, toż wziyna jaksik patyk i naczła sztuchać. Łoroz wszyjscy usłyszeli przeraźliwy jynk bolu i zdali se sprawa, że stało sie prawdziwe njyszczyńście !

Łostre jak diosi kolce rozi, dziubły „Miłość” we ślypia.

Kej yno tyn jynk usłyszało „Szalyństwo” zaroski spokopiło co tak richticznie się stało.

Naczło przeproszać, błagać o wyboczynie, aże wreszcie przisiyngło łostać przewodnikiym ślepyj z jeji winy kamratki.

Toż łod dowiyn - downa, skuli tyj igraczki, „Miłości” towarzyszy „Szaleństwo” .

___________________________
___________________________
autora niystety niy znom, ale za to przetłumaczył bojka niyjaki: Johanek