Wybiyrómy prezidynta ..

Ojgyn z Pnioków

Idzie to tyż posuchać na [link widoczny dla zalogowanych]

Wiycie! Jô pierónym niy móm rôd, niy ciyrpia welónku, wszelijakich wyborów. Gynał tak, jak niy ciyrpia zawartych dźwiyrzy i … lazarytów. Po jakiemu jô skuplowôł ze sia lazaryty, zawrzite dźwiyrze i latośny welonek (piyrszy, bo jesce nôs czekô welonek rajców miejskich i prezidyntów, birgymajstrów, sołtysów, landratów i jak by jich jesce inakszij mianować)? Anó, to sie pokôże dalszij.
Bezmać ftoś szpicowôł uszy i usłyszôł jak Komorowski łozprawiôł bez mobilniok ze Kaczyńskim. I wyglóndało to tak:
– Jarek?
– Sergust, Brónku! Jeżech festelnie rôd, iżeś dó mie glingnół …
– I jak ci chopie śleciôł dziyń?
– Dej pokój chopie! Wiela tyż to idzie gôdać do włóśnygo kota.
– Ja, ja … niy ma letko …wiym cosik ło tym …
– Ty to chopie mogesz przinôjmnij połozprawiać ze swojóm babeczkóm.
– Chopie! Niy znôsz mojij baby. Łostatnio mi rzykła, iże wiyncyj łozprawióm ze cia niźli śnióm!
Ale podle raje. Wiycie, zima mi po plycach furgo na widok zawrzitych dźwiyrzi. Dôwnij to i we mojim biurze, kaj mi sie na isto szykowniście wiydło, widok zawrzitych dźwiyrek styknół, cobych sie napocznół strachać, iże za niymi dziyje sie cosik niyherskigo, siaróńskigo, gróźnygo dló mie; eźli bółech jesce wtynczôs wymorzóny i bez humóru po côłkij nocy zôłganiô, łożarstwa abo eźli ganc ajnfach po bezsynnyj nocy nerwy mi sztinkrowali, bezmała czułech zbliżajónce sie niyszczyńście, i tyn anóng łolbrzimiôł i płynół ci ku mie bez kalne szyby we dźwiyrzach.
Podane łobrzidzynie czuja do lazarytów, strachóm sie jich i niy ciyrpia znôjómych, ftorzi sztinkrujóm na zdrówiu. Żôdnego tyż niy nawiydzóm, kiej moga sie ze tego wykuglować, boja sie, iże kiej łozewrza dźwiyrze lazarytowyj izby natrefia na łokropiczny widok, na kiery niy bółbych przirychtowany. Niy kca blank ajnfach łozprawiać ze ludźmi, kierych chop, łojciec, baba, mamulka abo dziecio mogóm być umiyrajónce … niy kca sie dowiedzieć, iże ftoś, kogo znóm, niy żyje.
Tym tuplym niy móm rôd, blank niy ciyrpia tyż welónków, wszyjskich welónków. Kiejsik, jesce za tyj łoszkliwyj „komuny” to wszyjsko bóło klar. Cowiek szôł do tyj urny abo i niy, wciepnół szkartka, abo i niy i na łostatku tak by tak wywelowali tego, fto miôł być wywelowany. A terôzki bez te łostatnie dwadzieścia lôt bóło roztomajcie. Nôjprzodzij wybrali prezidyntym tego istnego, kiery fuknół we Gdańsku bez tyn płot. Wiela śniym mieli żurnalisty uciychy i łostudy (kiej jim prziszło tłómaczyć jego szpicatô gôdka), to przeca kôżdy, fto chocia do hilfki deptôł, miarkuje. Niyskorzi wybrali modego karlusa, kiery ale miôł ci jakiesik łoszkliwe choróbsko, takô ci „filipińskô niymoc” go brała kiej ino kajsik za granica sie wykludziół. Zatym juzaś bóła srogo haja, kiej do welónku przistoł jedyn ze tych cwilingrów do kupy ze Duckym Dónaldym. Tyż byli, jak latoś, dwie tury po kierych prezidyntym łostôł cichszy, barzij taki bojónczek ło trzi śćwierci godziny modszy łod swojigo brata-cwilingra.
Latoś piyrszô tajla – bodej nôjbarzij dziwokij łod dwadziestuch lôt – kampaniji welónkowyj miała swój fajrant we pióntek po północce, we niydziela prziszôł taki mómynt, kiej łostalichmy sóm na sóm ze szkartkóm w gracy. Bo czego szło sie latoś trzimać? Kôżdy ze kandidatów tuplikowôł swoji, chocia blank podanie do inkszych:
– Mómy dzisiôj szanza sztuchnóńć Polska do przodku – tuplikowôł Kaczyński.
– Kca wypôłniać łobowiónzek wachtyrza „kónstytucyji” i twórzić państwo dlô łobywateli – eklerowôł hrabia Komorowski.
– Polsce potrza zmiany a polityce świyże, blank inksze wejzdrzynie, coby Polska stała sie inkszym krajym – gôwyńdziół Napieralski.
– To rzôdkô przileżitość we polskij polityce, coby móc welować „za” a niy „prociw” – bôjczół Olechowski.
– Móm wizjô prezidyntury na kiero niy poradzóm sie doczkać wszyjske łobywatele – ze côłkóm powôgóm skazowôł Pawlak.
A wszyjske do kupy sztyjc i jednym ciyngiym wyciyrali sie swoje gymby Polskóm i Polôkóma, tragedyjóm smolyńskóm i powódzióm.
A już wtynczôs móndroki miarkowali, iże wynik latośnego welónku jes ci blank niyspomiarkowany, bo eźli ziger niy wyłóni sie we piyrszyj turze, straci łóna kielikolwiek znaczyni. Bo drugo tajla bydzie sie rzóńdzić blank inkszymi reglami, to przeca niy dogrywka we finałówym fusbalszpilu ale blank inkszy szpil. Pamiyntómy przeca jesce prezidyncki welónek we 2005 roku. Dónald Tusk wygrôł piyrszô tura ze Lechym Kaczyńskim (33,6 do 33,1 proc.) coby po dwiuch tydniach przedrzistać szpil 45 do 54 proc. Idzie beztóż pedzieć, iże idzie wygrać a zatym zarôzki … przegrać.
I cosik mi sie zdô, iże ta piyrszô tura welónku bóła nikiej kolarskô prymiô górskô a terôzki szczwôrtego lipca bydzie choby fajrant Wyścigu Pokoju na dôwniyjszym Sztadijónie Dziesiyńciolyciô, bo przeca głósuje sie niy na welónkowô kampanijô ino na to, co bydzie niyskorzij a … Polska – jak sie terôzki fajniście berô – jes nôjważniyjszô! Ino kaj do pioeróna my sóm? My Polôki? Bo cheba prawie miôł Krzysztof Daukszewicz, kiery śpiywôł: my sóm jedyn nôród a … dwa plymia!