Juzaś ło gorzole

Ojgyn z Pnioków

Ludzie roztomiyłe! Przeca takigo fajrowanio to ani Amerikony, ani Miymce by niy szczimali. A bydymy juzaś mieć dwa fajery łoroz za dwa tydnie piytnostego siyrpnia.Dyć kiela idzie tyj gorzoły, machmolu i zajdli piwa wysłepać? A Polok poradzi, Polok ... musi poradzić ! Bo Polok – nikiej ci to godoł jedyn Rus Alosza Awdiejew, kiery sie sam do nos przikludzioł – je ci tak „gynetycnie” nasztalowany, iże bez gorzoły, to ani dziecek niy poradzi napochać. Polok ci do bajstlowanio bajtli musi mieć zawdy trzi „p”: po ćmoku, pod dekom i po halbie!!! A razinku to my sie terozki wartko ryjymy (co tam ryjymy? wczepurzyli my sie już, chocia nos tam za trela niy kcieli) do tyj cołkij „Uniji Ojropyjskij”. Ino, eźli tam, we tyj Ojropie tak na isto poradzom spokopić wiela to my richtik do jednygo chyrtonia ślejymy, poradzymy chlistnońć? Dom Wom bajszpil. Dejmy na to taki Japońcyk abo inkszy, co to mo szage ślypia. Wyduldo taki istny liter i zarozki ci świtnie w kalyndorz. Niy ma Japońca – niy ma problyma, pra? A Polok? Polok luchnie tyż liter-dwa na łeb i możno wykopyrtnie, ale jesce do imyntu, jesce blank ci przeca niy świtnoł. Łon ci dziepiyro medikuje kaj by sam jesce jedna gryfno halbecka, abo i dwie, spatrzeć?
Niykierzy to sie ani niy spomiarkowali, iże na sztandach idzie sie juń lajstnońć latośne łogorki, tomaty, cześnie, sztachloki lebo zimioki, bo przefajrowali aże do „Dnia Dziecek”. Tak ci tyż boło i ze naszym Bercikiym łod Majzlinyj, kiery sie spamiyntoł dziepiyro we czerwiyniu.
– Ty giździe diosecki, ty ślywoku, łożyroku – larmowała łod rańca jego staro na cołko siyń i tyrała za Bercikiym ze nudelkulom.
– Tyś boł wczorej taki naprany, iżeś nupel łod naszygo maluśkigo Hanyska tonkoł we piwie i kazywołeś mu go ciyngiym cyckać. Tego je już za tela. Musisz sie sam terozki łobiyrać: abo jo ... abo piwo!!!
– Aaa, ep, aaa ... wiela to tyż mo być tego piwa ???
Tropiom sie niyftorzy, iże jo durch szktyflom ło gorzole. No ale, tak ci to już u nos je. Jes możebny u Polokow tref bez gorzoły? Niy ! Bo, co to tak richtik jes taki tref bez machmolu?
Ano przilazujom ludzie, gawcom sie, kukajom. Niy ma gorzoły, to i niy poradzom ci sie trefić. Napoczynajom sznupać bele kaj za gorzołom. Eźli nojńdom, to sie spichnom i bydzie trefong. A eźli niy nojńdom? To bydzie ... „konferencyjo”.