Żyniaczka

Ojgyn z Pnioków

I terozki mi sie sam spomnioł konsek, kiery za starego piyrwyj beroł Karlik ze Kocyndra, znacy sie Stanisław Ligoń, kieregoch mioł we srogij zocy i do dzisiej we festnym reszpekcie. A, iże jo kiejsik mioł festelnie rod te Jejigo cołkie beranie, bojcynie a niy poradza terozki spomiarkować kajech to piyrszy roz usłyszoł, kaj żech to gynał naszoł, byda sam terozki to rzondzioł tak, jakech to łod modzioka spamiyntoł, jakech to boczoł i kajniykaj – bez te łostatnie poradziesiont lot fafloł:
Żyniacka to je sztrofa za tyn rajski fyjler Yjwy i Jadama i jejich festno pokuta. Coby wlazować we żyniacka trza niy mieć wszyjskich w doma. Kiej cowiek jes blank mody i sie żyni, lebo wydowo, to padajom na telkigo chopa ciubaryk i gupielok, starszyjszy to ćmiyl a kiej już blank stary to niyboszczyk sztrucla-po stojoncku sroł. Godajom ło wszyjskich żyniolach:fujara, cymboł, tromba i tak bez cołkie żywobycie chop jes zawdy jakimsik insztrumyntym do muzyki, bo bali i kiej jes blank maluśki to tyż godajom na niygo tromel znacy bymbyn. Ło babie juzas, kiero sie wydowo, to godajom co udowo inkszo, niźli na richtik jes. kiej sie ludzie żyniom to inksze godajom, iże sie łone blank zwekslujom na inkszo zorta. Chop ze jargały, napasztliwca i klugszajsra robi sie zarozki tulejom lebo ślimokiym, juzaś baba ze aniołka i dziubecka robi sie rajculom, pyszczycom i rzgmi na cołki karpyntel nikiej szejściolampowo „superheterodyna”. Tela co radijok idzie wyszaltrowac a baby ... niy. Babeczka we chałupie sie zdo, baby trza, bo bez baby toby chop blank sie schacharzoł, śloz na psy. Łona ci przeca poradzi i jegły i grample, widły zbajstlować. Chopa tyz na isto potrza, bo bez chopa, choby i ipty niy bydzie dziecek (no, możno terozki cosik tam ształnujom i czachmarzom roztomajte hamerikońskie mondroki). Na tym zogonie wdycki sie chop ze babom dogwarzom, choby ci sie blank bez cołkie żywobycie sie niy poradziyli spokopić. Chop zawdy chalato i stynko na baba, a juzaś baba tyż molyndzi na chopa. Nale, tak już cheba musi być, bo jedyn bez drugigo niy poradzi sie spamiyntać, a i te cołkie ananasy i mandle, we tym raju pociepli, coby do kupy tyn diosecki corny chlyb na beztydziyń wroz ćkać, choby i zakalec mioł, bele by boł herski. Gorzoła wypokopioł chop, kiery mioł zwadliwo babeczka, juzaś woda – wykidano ci na palica chopa – snokwiyła na doczkaniu ... baba. Jesce, coby chopa do porzondku sporzondzić mo baba – we letkich falach – nudelkula lebo srogi hok, i wtynczos dziepiyro chopowi sie wybiere, łozjaśni, iże jejigo babeczka, to niy jes szucman lebo policajt, kiery tego ordnongu wachuje i wystrzeguje, chocia ino łone łoba niy poradzom spokopić, po jakiymu dziecka larmują i sie łozdziyrajom ci na cołki karpyntel. Som tyż telkie po żyniacce, kiere sie ciyngiym pierom nale, wtynczos mianuje sie to „harmonia” (juzaś jakisik insztrumynt) ino niy poradza spokopić eźli to jes mondharmonijka lebo akordijon cija lebo kneflowka. Nale, tak by tak, jes to gryfny „insztrumynt” na kierym do kupy majom grać i chop, i jejigo babeczka.
Ojgyn z Pniokow