Torg i byki...

Ojgyn z Pnioków

Na takim poznańskim torgu rolniczym „Polagra” szpacyruje ci sie pampon ze swojom babom. Zaklechtali sie na taki sztand, na kierym pokazowali szumne i szykowne byki. Podłajżom do piyrszyj kloty a tam na takim papyndeklu jes naszkryflane:
„Tyn byk wlazowoł we łońskim roku na kalymba, na krowa piyńćdziesiont razy.”
Babeczka tego pamponia tak zolytnie sztucho go we ziebra i godo prziliźnie:
– Hej, chopecku, dzisz to ? Piyńćdziesiont razy we roku tyn byk to robi! Mogbyś sie i ty cegoś łod niygo naumieć!
Kwanckajom sie dalszij, podlazujom do drugij kloty a tam tyż na tym papyndeklu naszkryflane jes tak:
„Tyn byk łońskigo roka wlazowoł na kalymba sto dwacet razy.”
Babeczka tego mimroka pamponia deczko festnij dugła swojigo chopa we ziebra i jesce barzij bomboni sie do niygo i godo:
– Hej, hej, eźli ty to miarkujesz? Tyn byk to robi, co kożdy chop mo robić swojij babie, wiyncyj niźli dwa razy we tydniu! Jużcić i ty mogbyś sie łod niygo moc naumieć!
Pyndalujom sie tak polekuśku, kackajom sie dalszij aże sztopnyli kole trzecij zegrody. A tam, tyż na takij szperplacie srogimi literoma wtosik naszkryfłoł:
„Tyn byk to isty rekorder; tyn herski byk we łońskim roku wlazowoł na kalymby aże trzista szejśćdziesiont piyńć razy !!!”
Żona chnet ziebra tymu swojimu chopowi niy połomała i już festnie zmyszono, mory jom bierom i godo ze rankorym:
– Kuknij sie ino chopie! Tyn byk to robi kożdydziyń! Łod tyj gadziny to mogbyś na isto moc dobrygo sie naumieć !!!
Chop już niy poradzi szczimać tyj szpicatyj godki łod swojij baby i ze festelnom spornościom godo do tyj baby:
– A ty, a ty to sie sam wrtko spytej tego byka eźli łon to robioł zawdy ze jednom i tom samom kalymbom ???