Ta samo lajera, kóniec świata...

Ojgyn z Pnioków

Idzie to tyż posuchać na [link widoczny dla zalogowanych]

Nó, tóż mómy już grudziyń z górki, już nóm sie łón kulo ku łostatkowi, nó... przodzij Gody, Dziecióntko... wónióncô chojna, gyszynki i możno deczko czasu dlô sia, dlô swojij familiji. I sam ci mi prziszło na myślónek, spómniôłech se, iże łod kielanostuch lôt bajrujóm ci nóm móndroki, fabulóm naobkoło roztomajte angyjbery ło... jakimsik kóńcu świata. Ja! Niyftore ipty niy poradzóm sie tego doczkać, sztyjc i jednym ciyngiym niy poradzóm przijść ku sztamie ze swojimi familijantóma, przocielóma i ze samymi... ze sia. A niyftorzi spóminajóm starucne nôcyje, ftore bezmać już kiejsik przepedzieli, iże chetki nôs sam już na tym niy nôjgryfniyjszym ze światów niy bydzie.
Wróżycie sie ciyngiym jak by sam zrychtować i nasztimować juzaś Gody? I na bezrok, i za keryś tam czôs ? Niy trôpcie sie już blank terôzki. Blank stare jesce planety gôdajóm, iże możno za jakiesik możno dwa, trzi tydnie żôdyn już blank niy bydzie miôł ze tym utrôpy. A po jakiymu? Anó beztóż, co już na zicher we 21 grudnia 2012 roku mô być prawy „koniec świata”, richticzny fajrant i do łostatka szlus ze tym niy nôjlepszyjszym ze światów. Nó ale, trza by sam napocznóńć – jak to kiejsik gôdôł Horacy – „Ab ovo usque ad male”, co idzie na nasze przetłómaczyć: „łod jajec do pónek” znacy sie gynał – „od początku do końca’.
Mómy przeca na świycie trzi blank srogie kónfesyje, religije – jak to móndrôki gôdajóm – „mónoteistycne”, kiere za pieróna kandego niy poradzóm sie co do jednygo dogôdać: eźli, i kiej, przinôleżi sie deptać do kościoła na mszô. Eźli to mô być we pióntek, we sobota abo niydziela? A podwiyl niy poradzóm tego na isto wyszpekulować do łostatka, to co dziepiyro gôdać ło tym jednym jedzinym dniym we kierym mô być, mô przijńść na nôs tyn szlus naszygo świata? Przeca bali i te côłkie sroge Świadki Jehowy tyż ci już terôzki niy podôwajóm roka, ustali łoznôjmiać, bo ino we XX wiyku planetowali aby dziesiyńć razy, iże na zicher bydzie szlus ze światym, a kiej sie cowiek już łoparzi i szajsnie, to ci to tyn fal naumi go pozorności. Jużzaś te wszyjske Muzelmany łobstôwajóm przi ichnij tysióncpiyńćsetletnyj rocznicy wykludzyniô sie proroka Mahometa ze Mekki, co jes tyż takóm ci szykownóm a łokróngłóm datóm tela, co pomykô côłki grónt fajrantu tego świata aże do 2122r naszyj krześcijanskij ery. Tak by tak, te – jak to roztomajte móndroki gôdajóm – przesilynie zimowe we 2012 r. flichtuje wszyjskim religijóm. A to bezmać beztóż, iże te ci datum trefiyło dó nôs direkt ze fest zaboczónyj hamerikóńskij dżóngle a niy ze Bliskigo Wschodu, skany wandlujóm sie te trzi nôjważniyjsze kónfesyje. Wziyno sie to wszyjsko tak po prôwdzie ze kalyndôrza Majów, kiery mô fajrant gynał we tym dniu, we tego 21 grudnia 2012 roku. Wiycie, ta côłkô „prekolumbijsko” cywilizacyjô zapôchóniyła sie tak po prôwdzie kajsik kole XI wiyka. Jak to tyż sie galantnie skłôdô, co nôjważniyjsze tameszne móndrôki tak gynał łobcyrklowali we tych jejich kalyndôrzach prziszłość tego niy nôjgryfniyjszego ze światów ze takóm ci tysiónclytnióm nadmiaróm już po jejich zapodzióniu sie, po jejich stracyniu sie ze tego świata.
Ale, niy jest to jedne ino przepejdzynie. Na tyn 2012 rok skazuje tyż taki gryfny „kod biblyjny”. Bezmać kajsik we 1994 roku hormijô izraelickich móndrôków – podszukowaczy rozknółtlowała i łodczytała blank snowa ta starotestamyntowô „Ksiynga Rodzaju” we „Bibliji” i wykôzali łóne, iże tam tyż idzie richtich cosik sie dosznupać, co jes skuplowane ze naszymi czasami. Móndrôki gôdajóm, iże we biblijce idzie wynuchtać i take wróżby ło II Wojnie Światowyj, i ło tyj atóm-bómbie. Tu tyż sknółtlowane to jes ze datóm łostatka tego naszygo świata, kiery moge padnóńć skuli wojny atómowyj abo skuli tego, co Ziymia moge sie strzaść ze jakómsik niy za tela srogóm „asteroidóm”. Nó, i bół bezmać jedyn taki istny, prorok Malachiasz urodzóny we Irlandii (świyntym łoznôjmiyli ci go we 1190 roku), kiery wykłôdôł, iże łostatnim na tym świycie Łojcym Świyntym bydzie tyn, kiery przijńdzie po Benedykcie XVI. Te zwekslowanie sie papiyży mô być neści tyż we tym 2012 roku, a to już za tydziyń.
Mógbych sam tak i porã godzin berać ale fto by to poradziół szczimać? Spómna sam ino na łostatek jesce podle raje we krótkich abcugach i ło Chincykach, i ło „proroctwie Orlona” (kiery tyż skazowôł na 2012 rok), i ło planetowaniu Edgara Cayse’a – wróża ze Hameryki, Italijoka Mario de Sabato, nó i tego Michela de Notredame ze Saint-Rémy mianowanego Nostradamusym. Nó, i tyż ło ludziach kierych planetowanie poskłôdali inksze ludzie do kupy we takij ksiónżce „Mass dreams of the future”. Ale ale, na ta „asteroida” astrónómy, gwiôździôrze sztyjc mustrujóm, jednym ciyngiym kukajóm, bo łóna tak sie we tym kosmosie furgô i moge richtik we tym 2012 roku we ta naszô ziymia prasknóńć.
Mockã tyż bóło do terôzka ludzi, roztomajtych móndrôków, kierzy kcieli na swój knif wyeklerować inkszym wszyjsko ło tym „końcu świata”. Taki na tyn przikłôd Lawrence E. Joseph, ftory we jego „Apokalipsie 2012” pometlôł gynał wszyjsko, co ino poradziół do kupy sknółtlować. Byli tam i łómyny starożytnich Indiów, roztomajte tajymnice wywołanych laborów ruskich gyjofizyków, ku tymu tyż fachmanów łod badaniô Słóńca, wulkanów, klimy i diôsek wiy cego tam jesce.
Byli tyż i jesce inksze fale. Ludzie przecamć miyniyli, iże jedyn papiyż św. Sylwester we 317 roku zawar ci we podziymiach Watykanu srogigo dracha. Wedle staryj powiarki, tyn drach miôł wykludzić sie ze tych podziymiów we jarystag skonaniô świyntego i przetyrmanić côłki świat, kiej ino sie napocznie tysiynczny rok. We nocy 31 grudnia 999 roku wszyjskie ludzie na tym naszym, ale jakech pedziôł, niy nôjgryfniyjszym ze światów, byli moc przelynkniynte i mieli blank miyntkie szłapy i pôłne rzicie bobków. Kiej ale już po północce blank nic złygo sie niy stanyło, wypraskła festelnô uciycha, ludzie sie radowali choby jim fto szykownô zista łobiecôł. Gryfnô to gyszichta, prôwda? Tela, co łóna niy jes prôwdziwô. Jes ale tyż i gryfny byfyjl, dlô kôżdego bali i do tych naszych posłów i reskiyrujóncych naszóm Polskóm; możnô ci już i Ducka Dónalda, tego zwekslowanego cwilingra i wszyjskich tych jejich usmolónych kamratów tyż niy bydzie?
Tyn dziyń 21. grudnia trefi ło szkucina przed Godami. Łopytowujecie sie możno i co ze tego? Anó, nic, smolół pies, przeca żôdne ci nôs tam lecy jake drachy niy wystrachajóm. Jakiesik take tam jak: „ ... pesymizm ekonomiczny, spadek siły nabywczej ... niepokoje społeczne ...” „mordyrstwo smolyńske” i take tam jesce inksze gupoty, kiere nóm ciyngiym wstyrkajóm te ze wiyrchu, te angyjbery ze Wiejskij we Warszawie.
Nó, tóż jakech pedziôł, łod 2012 roku niy trôpcie sie, niy musicie sie blank hruzić ło to, jak urychtować Gody, bo Bożygo Narodzyniô już sporzij na isto niy bydzie. Ale podwiyl co, latoś jesce muszymy to jesce jakosik ściyrpieć; niy ino Gody ale jesce ku tymu i Zilwestra i tyn srogi niyskorzij... kacynjamer!