Seta ...

Ojgyn z Pnioków

Idzie to tyż posuchać na [link widoczny dla zalogowanych]

Latoś to mieli my ci jakiesik pofyrtane te latowe miesiónce. Jak rółz ci bóło blank gryfnie, to zarôzki na drugi abo trzeci dziyn, siómpiół dysc i robióła sie chlapaka. Nic, ino sie łożrić, ścioprać we szynku (bo w dóma starô filuje i przezywo na kôżdô achtla, cyjntla lebo halbecka). Jô tak ciyngiym szkryflóm ło gorzôle na paskuda naszymu kapelonkowi ze „Jozefki”, kiery niy ciyrpi tyj łopary i machmola, i sztyjc ze kazatelnicy tuplikuke, iże to je łostuda, grzych i skôranie boskie. A przeca już ci we biblijce je naszkryflane, co sóm Pónbóczek we Kanie Galilyjskij zwekslowôł woda na jabola. Przeca to znôcie, pra?
Jô tyż móm rôd i dobre piwo i lepszejszô gorzôłka, a nôjbarzij to mi sie zdo, kiej lejza do naszego Pyjtra i poradza tam pôra dobrych halbecek ze kamratóma łobalić.
No, a niyskorzij? Niyskorzij to je kacynjamer, szmerckopf, i jak ci to kiejsi śpiywôł Wiesiek Golas: „tómpanie biôlych mew”. Znacy sie srogi kac.
A na kaca? A na kacynjamer to nôjlepszy jes klin. I jak to gôdajóm: seta z rana, lepszejszô niźli zana.
Wysłepiesz chopie seta i inkszy cowiek we ciebie wlazuje. Wlazuje i ... tyż mu sie chce słepać. No, tóż chlist w tyn gupi pysk. I tyn inkszy cowiek, kiery we cia chopie juzaś wloz ... przismycół ze sia kamratow, kierym tyż sie kce słepać. A ło szaroku, z rańca? A ło szaroku zasik usmolóny dziyn i juzaś seta i nowy cowiek wlazuje we cia .... chrrr, chrrrr, chrrrrrrr .......