Sakramyncki kac

Ojgyn z Pnioków

No toż momy i trzecie tysionclycie, i dwadziesty piyrszy wiyk, i... kaca – takech kiejsik napocznoł moji bojcynie. I to nojgorzij jes ze tym łostatniym. Chocia... niy cołkiym, niy tak blank. Bo jak naszkryfloł mi bez internyt taki jedyn kamrat ze Świyntochlowic:

„Fto niy mioł kaca, niy wiy co to jankor,
Kiej kufa drzewnianno a na ślypiach charboł.
Kiej koty tompiom raciami ło blachy,
A dziamble w szlagcojg walom i dziurawiom dachy.
Suchość we cowieku łod gymby do duszy,
I bolom cie pazury, i kudły, i uszy.
Niy pogymzisz, niy legniesz ... a nojgorzij siedzieć,
Co kwilka ci sie chepnie przedwczorejszym śledziym.
Możno som i takie co kaca niy mieli ...
Nale, coż łoni w życiu culi, coż łoni widzieli ?”

Nasz downiyjszy wikary ze „Jozefki” to by ci pewnikiym pedzioł, że na kaca to nojlepszij... blank niy słepać gorzoły. Nale, widzioł fto chopa ze Pniokow, kiery by niy mioł rod gorzołecki? Jo niy znom żodnego takigo. Cheba, iże Bercik łod Majzlinyj, kiery już niy mo leberek a nyrki smycy we bojtlu plastikowym kole rzici. Ino co to za chop? To stare galoty a niy chop, prowda?
We wszyskich cajtongach ciyngiym bez cołki rok szkryflajom, co możno robić coby niy mieć – jak śpiywoł Gołas – „tupotu białych mew”?
Dać potrza tymu swojimu „organizmowi” – jak kiejsik szkryfloł „Dziennik Zachodni” – to, co tyż zebroł tyn ankohol. Mie to tam nic niy zebroł a doł dobro lałna, bołech wizgyrny i miołech łod aże sto pieronow uciechy. I tu żech jes śnimi zgodliwy – niy pić mlyka (przeca nos, chopow już downo łod cycka łodstawiyli). Cheba, iże ftoś wypokopi, iże mo to być richtik maślonka. Możno to i jesce harynek abo dobre piwo z jajcym. Na łostatek omszlak z modych cyckow, nale ino łod dziołchow kiere ci majom ino dwadziyścia lot i ... do tego blank modo wyglondajom. To wszysko inksze, to som berdyje i jakiesik medikamynty łod goroli; Ślonzok nasz chop to wiy. Na kaca jes ino klin. Przeca nic tak niy lycy, ani Apap, ani Aszpiryna, ani Alka Prim i ani te inksze moderne pile, ino dobry, zimny sznaps i szopa piwa. Tu możno bydzie i łostuda. Niyftore to niyskorzij majom kaca „szpiralnygo”. Niy wiycie co to jes? To jes tak: eźli Wy mocie kaca chopy, a tyn wasz kac mo tyż jesce kaca i niyskorzij tyn kac, tego waszygo kaca, tyż ci mo kaca, to to ci jes na isto kac „szpiralny”.
A jo Wom musza pedzieć, iże po gyburstaku mojij Elzy (i możno tyż byda mioł jutro po mojim), to jo już mom zawdy aże trzi „szpirale”. Dalszij to już bez szpasu aże wytrzyźbiyja.