PAPAGAJ

Ojgyn z Pnioków

Suchołech kiejsik na telkij biysiadzie we Chorzowie telkich Lwowiokow z Bytonia, kierzy mocka gryfnych śpiywek wiskali. I boła ci śniymi telko jedna wyszczekano Danuśka, kiero cołkiym po lwowskiymu zagodała biesiadnikow gynał na śmiyrć. Padom Wom, ciort a niy baba. Tako w doma przi telefonie to ci dziepiyro musi być łostuda. To tak gynał jak u nos ze Jozikiym łod Gominiorki. Przijechoł ci boł kiejsik ze sanatorium a tu rechnung za telefon – cołkie śtyrysta złociokow. Żodyn mu sie we chałpie niy prziznoł, iże kajsik glingoł, ani staro, ani dziecka; to fto? No, to pewnikiym ino papagaj. Jozik biere tego papagaja za piyrze i rycy:
– Kaj żeś ty franco jedna dzwonioł?
– No, na ... telkie „party line” do Kasi Figury – pado ptok, bo to boł samiec.
– Kiej jesce roz bydziesz tam telefonowoł, to cie ty giźdie pieroński łoszkubia ze piyrzo i powiesza na gipsdece – pado Jozik.
Na bezrok te same, ino że terozki to już boło szejśćset złociokow. Jak pedzioł, tak i zrobioł. Przibioł ta papuga za krzidła do ściany i łostawioł. Ta sie tak ino szpetnie gawcoła na wszyskie strony. Ujrzała Jezusicka przibitego do krziża. Nojprzodzij nic niy godo ino sie dziwuje i dziwuje. Po jakiesik kwilce pyto sie go:
– Suchej no, a dugo tak już wisisz na tym krziżu ?
– Ano, bydzie chnet ze dwa tysionce lot kiej mie te Żydy powiesiyły.
– (???) Dwa tysionce lot?..... To kaj żeś ty do pierona dzwonioł ???
Nale, może być i tak jak we jednyj śpiywce :
„A kiedy szynkwas coroz gibcij krynci sie,
Ty bracie prozny kufel na połniuśki zmiyń.
U kogo w kuflu pokoże sie suche dno,
Tego w życiu trefi zło!”