Możno i szport ....

Ojgyn z Pnioków

Gôdajóm tyż łoszkliwce, że chnet bydóm bajstlować szportszpile, zawody kaj bydzie szło zrobić majstra we szkryflaniu gupot bez telefółn. A sóm tyż i bezmać take wyturnowane, kiere bali i we kicholu dubajóm kściukiym a niy srogim palcym, bo jejim ucióngnół sie taki dugi łod tych „esemesów”. Nó, i tak choby tego szportu corozki mynij u tych dziecek. Możno przijńść i tak, jak to we jednym wicu bóło:
– Ecik, a cóżeś to sie we graca zrobiół, iże jóm môsz we gipsie?
– A wiysz, to wszyjsko bez turnowanie szportu.
– Szportu padosz? Tyś taki spaśny, to jaki ty tyż tyn szport uprawiôsz?
– Ano, to wszyjsko skuli szachów ...
– ??? Co padosz, skuli szachów? A łod kiej ty we szachy grosz? Przeca do tego trza mieć ździebko łoleju we palicy.
– Niy jô gróm w szachy, ino tatulek ... i jejimu laufer ślecioł na dyliny ...
– Niy poradza Ecik tego spokopić ...
– Nó, łojcowi śleciôł laufer na zol, jô sie na niym kiołzdnół, prasknół choby dugi i złómołech graca!!!
I kiej my już byli przi tym szporcie nynaniu przi kroczaniu to mi sie spómnieli gryfne słówecka jednygo móndroka:
„Bezsenność skraca sen, ale niekoniecznie wydłuża życie, chociaż czasem czyni je ciekawszym!”
A szport – to cygareta, a „Ruch” – to budka ze cygaretóma. Znacy sie szport to zdrowie, pra?