Letke jscanie...

Ojgyn z Pnioków

Idzie to tyż posuchać na [link widoczny dla zalogowanych]

Wiycie, jô już kiejsik dôwno tymu nazôd napisôł cosik ło niykerych ryklamach, ftore fóngujóm (co tam fóngujóm, niy dajóm żyć) we naszyj telewizyji, kajech próbowôł wyśmiôć to wszyjsko, co idzie znôjść we ryklamach telewizynych. A terôzki wlôz mi razinku w grace artikel jednego festelnego móndroka (ftorego móm pierónym rôd czytać) Henryka Martenki łod kierego niy poradziółech sie blank łoderwać, i musiôłech tyn artikel wartko na naszô gôdka przetłómaczyć. Na isto werci sie to poczytać, bo chop mô moc prawie kiej gôdô ło zachach, ftore niyjednego snôs poradzóm richtik snerwować i festelnie nóm wszyjskim dopolić, tym tuplym, kiej niy poradzymy sie doczkać na dalszô akcjô we filmie abo ... bele czym. I niy bydzie to take blank gynał przełóżyni, a ino pisanie ku tymu podane, co Łón napisôł. Nó, tóż poczytejcie:
Noc ci bóła łokropicznô. Isty horror. Pôlynie, „zgaga” – jak gôdajóm móndroki – poradziyli mi łozprasknóńć mój kałdóń, a lelita naplómpane choby żagle ze „Chopina”, targali mie jak diosi przi tepichowych atakach mokrego kucaniô łozdziyrajóncygo hośle, gordziyl i côłki tyn mój capióncy starymi zezwłókami organizmus. Ze kichola ciurlikała mi jakosi modrawô wydziylina, a ku tymu jesce kwawiónce, łopuchniynte dziónsna niy dozwôlały mi bali zawrzić gymby. Chrómpała mi we daklach rubô wiksówa, taki orynszmalc, a spamiyntale dyrgocónce himoridy żyły swojim włóśnym, niyzalyżnym łod mojij rzici, życiym. I te ci jesce świyrzbiónce miyndzy palcyskoma szłapów grziby, podrôżnióne skuli letkigo „niytrzimania” jscochów .... Czułech, co zapôdóm sie we depresjô srogszô niźli nasze Żuławy, kiejech sie spómniôł nôgle, iżech ci sie założół nôjnowszyjszyj gyneracyji podpôska, kierô dowo mi ci stoprocyntowô łochróna. Łobudziółech sie tóż tyż festnie wyspany i rôd wszyjskimu jak kôżdy ipta i idiółt, ftory wszyjskie wieczory przetrowi na łoglóndaniu telewizyji ... znacy sie ... tych ryklamów.
Liczba ryklamów – nadôwanych bez wszyjskich, ftorzi mogóm to robić – a zajimajóncych sie wydziylinami i choróbskami cowieka – kôże nóm gymboko pomedikować nad prawóm, psychijatricznóm i kriminalnóm zajtóm handlu, dlô ftorego ryklama jes wajchóm, znacy ... „dźwignią”.
Ryklama glancowanego, blyscóncygo lakfarbóm autoka niy robi już żôdnygo wrażyniô. Ryklama feryjów wyździywô pytani: eźli prziwódca, ważny lajter ryklamowanygo kraju jesce reskiyruje abo już śmietnół do Arabiji Saudyjskij? Fto juzaś kce pofurgnóńć na Bali lebo inksze Szeszele, niy szukô powiydzki, wôbika we telewizyji. Takij ryklamy mu przecamć niy potrza.
Ryklamów potrza marziciylóm, sztyjc wiyrzóncym, iże 30-sekundowy „spot” podpowiy jim, co zrobić, coby juzaś być modym, pijynżnym i zdrowym. Eli sie niy udô ze dwióma piyrszymi, to chocia moge zagarantjyrować te trzecie. I eźli łoglóndô ryklamy ftosik, kómu doskwiyrô „prostata” abo go łosłôbiô kwawô laksyra, tyn ze nôdziyjóm przijimô „spot”, we ftorym wciepniynty do fuzekli, niygrajóncy już nikaj szałszpiler, skukany pod fałesznóm tytulkóm profesora, ze uśmiychym wciskô fynsterkit. bo tyn fynsterkit dowo ta chocia nôdziyja, iże jakosik iptowatô medicina przedichtuje zdechlokowi i szlapszwancowi kichol, zagarantjyruje mu yntlich friszny dych i przebródzi wlazowaniu restu jôdła pod gybis. Tak ci jesce trôpia sie ło to, wiela tyż to złocioków trza bóło zabulić tymu istnymu, coby ze sia idijółta robiół, kiej wali we bymbyn i wrzescy: bez vat, bez vat, bez vat ... Abo – i sam dejcie pozór, bo to jes ryklama ze łostatnich dni – medikamynt, ftory chyci bómbylki gazu i szibnie je ze organizmusu. Łostatni medikamynt pometlôł mi mój filip na dugszij. Tyn zynzacyjny szpecyfik mô we jedziny i niypowtôrzalny sztrich łozwiónzać próblym sztopszajsu, łobsztrukcyji i przirodzónygo procysu „fizjologicznego”, jakim jes ... nasze pierdzynie.
Ze telewizyjnyj ryklamy wynikô jednakowóż, iże społkniynty pryparat wchłónie te bómylki i ... nó, beztóż ... jak sie jich pozbydzie? Jak je szmajtnie raus? Możno ze jakimsik ci tam szczypaniym sumiyniô? Tak by tak trza nóm sztyjc i jednym ciyngiym ... pierdzieć. Tóż za co sam trza bulić – i to bez szpasu – na isto mocka pijyndzy?
Cyganiynie i fabulynie, ftore leje sie, kidô i ciurlikô ze wszyjskich ryklamów medikamyntów, jes na zicher bamóncónce i upójne jak taki ci pierónym zasrany „pampers”. Szpecyfik tyn, jak wołô ryklama, erbnół srogô nadgroda profesorów farmacyji. Znacy sie kogo gynał? Kaj sóm te profesorske miana? Pitli do kupy ze tymi bómbelkóma abo wlejźli w charki?
Wiycie, Polska jes jednym ze nôjsrogszych rynków handlu medikamyntami, a pozióm letkowiyrnóści i łogupiyniô kónzumynta, blank niywiela nôs dziyli łod Pigmejów i możno ino jesce ... łod Hamerikónów.
Jezderkusie! „Rutinoscorbin jes szóstym kómpanym we naszyj familiji”. Tak wdziynczy sie we rozdziylczóści HDI idijółctwo i gupota, za ftore buli fyrma farmaceutycznô setki tysiyncy złocioków – a zarobi na tym pôrã milijółnów. „Zabiółech zgaga” – raduje sie ipta we inkszym „spocie”, a jô we gowie – jako nałógowy tele-idjółt – móm już kónkuryncyjnô „mantra”: „Już w porzóndku, mój żełóndku”. „Dbô ło drógi moczowe” – wrzasklawie zapywniô jesce inkszy uciyszny „spot” wrajżóny miyndzy ryjda smolyńskij gdowy a kómyntôrz Jacka Pałasińskigo ło beatyfikacji papiyża. „Łozrzydzô wydziylina, ale niy zwiynkszô jij łobjyntóści!” I tu, dejcie pozór! Tymu ausdrukowi poświyńciółech mocka badaniów „empirycznych” ... niyudanych bali, bo wiela razy ta ci wydziylina łozrzydziółech, tela razy zwiynkszółech jeji ... łobjyntóść. Nale, niy byda sie tym razinku podniycôł. Zachowóm sie jak ta „Xenna”, bo: „zadziôłóm skutnie, ale niy gwôłtównie”, co deczko przipóminô mi gyszichta zgrabaźniałygo pacijynta festelnie zniynawidzónygo bez lazarytowy perzółnel. Starzik tyn ci poduk ordnóngu srôł ło siódmyj ło szaroku, ale cuciół sie dziepiyro pół godziny niyskorzij. Blank i do łostatka wyspany i rôd wszyjskimu!