Gustlik i gorzoła

Ojgyn z Pnioków

Przy słepaniu gorzoły trza zawdy na wszyjsko dować pozor. Bo kiej sie niy do pozor to moge być tak nikiej ze Gustlikiym łod staryj Gorzelocki.
Boł ci łon kiejsik na fajerze i pech kcioł, iże zabrakło gorzoły i sztofu, cyli piwa. No, toż wszyjskie posłali Gustlika, skuli tego co łon boł nojmodszy, na sztela po gorzoła. To jesce boło na łostatek srogigo Eda (tego wiycie: Gierka). Ślazuje Gustlik po słodach i łoroz gawcy a sam we siyni, blank na spodku, leży jakisik – barzij jak som Gustlik – naprany panoczek. Trza go hilfnońć pomedikowoł Gustlik.
– Panoczku, a dyć co wy sam robicie?
– Jo, jo sam ... miyszkom.
– Sam? A kaj?
– A, na drugim sztoku.
– A kluce łod dźwiyrzy majom panoczku?
– Ja, sam we weście, we lewyj kabzi.
Wzion Gustlik tego panoczka pod parza, zatargoł go na drugi sztok, wyciong kluce, łotwar dźwiyrze, wrajzioł mu kluce nazod do kabzy i wcis rajn. Śloz na doł, a sam we tym samym miejscu, kaj przodzij, leży ufifrany tyn som panoczek.
– Jezderkusie! A co łoni sam robiom?
– Jo? Jo sam miyszkom.
– Sam? A kaj?
– A na, na ... drugim sztoku.
– A kluce łod antryju majom?
– A mom. We weście, we lewyj kabzie.
Gustlik sie już deczko zmochoł, nale biere panoczka pod parza i targo go na tyn drugi sztok. Wyciongo kluce, łotwiyro dźwiyrze do antryja, wtyko kluce nazod do westy, i szibuje panoczka driny.
Kiej zasik śloz nazod na doł, kuko a sam, jesce barzij zmaraszony, łobdrzistany, leży panoczek we tym samym miejscu.
– Sto pieronow, przecach niy je telki naprany, co mie straszy, abo co?
Nale, iże boł dobry cowiek, zgiboł sie nad naprańcym-panoczkiym i zasik pyto:
– Hej, suchajom łoni jeny. Co łoni sam robiom?
– Jo, jo, jo ... sam miyszkom.
– Łoni sam na isto miyszkajom?
– Ja, na isto, na drugim sztoku, a kluce mom we weście, we lewyj kabzie.
Narozki tyn naprany wejzdrzoł sie na Gustlika i jak niy wrzesknie:
– Cof sie giździe pieroński łodymie. Jo sie już niy dom przeca trzeci rołz wciepnońć do windy!!!
A już za starego piyrwyj mondre ludzie godali, iże alkohol słepany ze umiarym, opaternie niy szkłodzi nawet we nojwiynkszych ... ilościach!!!