Dwa gorole - żaba ..

Ojgyn z Pnioków

To wszyjsko je gynał, nikiej w tym wicu ło szporobliwych gorolach:
Idom se dwa gorole na torg do Nowego Targu. Jedyn idzie skalić krowa, a tyn drugi jakosik sie kalymba lajstnońć. Tompiom tak, deptajom aże łoroz tyn drugi sie pyto:
– Jyndrek, a niy skaloł byś mie ta krowa terozki, to by my niy musieli tak daleko pyndalować, klechtać dalszij?
– Wiysz Giynek, niy moga ci sam na ceście jeji skalić, bo co torg, to torg. Roz do roka trza tam sie przikludzić, i tam ino mogymy cosik utarżić.
Nale, kiej tak idom, klara corozki wyżij blynduje i łoroz juzaś tyn piyrszy Jyndrek, taki szpasownik godo:
– A dzisz tam we przikopie ta żaba, co ci tam skoce?
– A widza, i co?
– A kiej jom łapniesz i wećkosz, to jo ci ta krowa dom, ale bez tyj mojij kety.
Tyn drugi fuk do przikopy, zdyboł ta żaba i – chocia go ździebko łociepało, łosiywło i na rziganie sie mu zebrało – łyknoł ci jom, łyknoł ta rapitołza.
Idom dalszij. Jedyn trzimo krowa za łogon a drugi mo ino keta. No, i tymu co ta żaba łyknoł żol sie tego drugigo zrobioło i godo:
– Kiej terozki ty łykniesz ta żaba, kiero tam juzaś skoko, to jo ci dom ta krowa we cołkości nazod.
Co mioł borok robić? Fasnoł ci tego chrostoka, ta chrostawo żaba, łyknoł, no i zebroł ta swoja krowa nazod. Tak ci dokulwitali sie do tego Nowego Targu. Tyn co kcioł kupić – lajstnoł sie ta krowa łod tego, co jom kcioł skalić; tyn co kcioł skalić – skaloł tymu, co po krowa szoł, i to do kupy ze ketom. Idom sie terozki nazod, mierznie jim sie i tyn piyrszu godo:
– Tyś kcioł kupić krowa, jo kcioł skalić, prowda?
– Ano, prowda!
– Ino rzyknij mi ... po jakigo pierona my yntlich ta żaba wećkali, zeżarli ???
A wszyjsko sie rozłajzi ło pijondze. Jedyn kce to skalić za pora betkow, inkszy juzaś medikuje co na tym skalyniu bydzie za Rothschilda robioł. I niy poradza ino sam ujzdrzić cweku, coby sie sam znod taki, kierymu by sie kciało kcieć!!